Óslitið frá árinu 2002 hefur JCI verðlaunað framúrskarandi unga Íslendinga.

Í tvígang hefur Ísland átt fulltrúa í röðum þeirra tíu sem heimsstjórn valdi en það eru þau Kristín Rós Hákonardóttir sundkona sem hlaut þau árið 2003 og Guðjón Már Guðjónsson frumkvöðull árið 2009.

Hér fyrir neðan má sjá lista yfir þá sem hafa verið verðlaunaðir:

Árið 2019

Pétur Halldórsson

Fyrir störf á sviði siðferðis- og/eða umhverfismála

Pétur er formaður Ungra umhverfissinna og er ötull talsmaður náttúruverndar og valdeflingar ungs fólks. Lokaverkefni hans í líffræði var rannsókn á íslenska himbrimastofninum en engin haldbær gögn voru til um íslenska stofninn. Pétur er í stjórn Landverndar og er mikill talsmaður þess að samrýma loftslagsaðgerðir og endurheimt vistkerfa.

Árið 2018

Ingileif Friðriksdóttir

Fyrir framlag til barna, heimsfriðar og/eða mannréttinda

Ingileif er laganemi, fjölmiðlakona og áhrifavaldur sem hefur notið mikilla vinsælla á samskiptamiðlinum Snapchat. Hún hefur starfað sem blaðamaður hjá Morgunblaðinu og stýrði þáttunum Hinseginleikinn fyrir netútgáfu RÚV.

Árið 2017

Ævar Þór Benediktsson

Fyrir afrek á sviði menntamála

Ævar Þór er leikari, sjónvarpsmaður, útvarpsmaður og rithöfundur með brennandi áhuga á að skemmta og mennta ungt fólk. Hann hefur skrifað bækur sem eru bæði skáldsögur og bækur sem vekja áhuga á vísindum hjá börnum. Hann gaf seinast út bókina Bókaflóttinn mikli sem kom út á ensku og dönsku. Hann hefur einnig hlotið viðurkenningu frá samtökum móðurmálskennara fyrir framlag sitt til íslenskrar tungu og hlaut viðurkenningu fyrir að vera einn af bestu barnabókahöfundum Evrópu.

Árið 2016

Tara Ösp Tjörvadóttir

Fyrir framlag til barna, heimsfriðar og/eða mannréttinda

Tara Ösp Tjörvadóttir er ein af forsprökkum #égerekkitabú samfélagsmiðlabyltingunnar og tók þátt í stofnun samtakanna Geðsjúk.
Hún hefur barist fyrir fordómum gegn andlegum sjúkdómum síðan hún kom út úr sínum þunglynda skáp 2015, eftir 12 ára baráttu við þunglyndi.
Nánari umfjöllun

Árið 2015

Rakel Garðarsdóttir

Rakel Garðarsdóttir

Fyrir störf á sviði siðferðis- og/eða umhverfismála

Rakel Garðarsdóttir stofnaði velferðarsamtökin Vakandi upp á sitt einsdæmi en samtökin berjast fyrir minni sóun matvæla. Síðan að samtökin voru stofnuð í ársbyrjun 2014 hefur orðið mikil vitundarvakning og viðhorfsbreyting í samfèlaginu um sóun á mat.

Árið 2014

Sævar Helgi Bragason

Fyrir störf á sviði tækni og vísinda

Sævar er framúrskarandi ungur vísindamaður sem hefur í mörg ár kveikt áhuga barna, ungmenna og fullorðinna á alheiminum og stjörnuskoðun. Hann safnaði meðal annars öllu fé sem þurfti til að gera Galíleósjónaukann að veruleika og heimsótti 150 skóla í tengslum við verkefnið.
Nánari umfjöllun

Árið 2013

Guðmundur Stefán Gunnarsson

Fyrir störf á sviði mannúðar- eða sjálfboðaliðamála

Guðmundur Stefán er íþróttakennari og júdókennari í Reykjanesbæ. Hann stofnaði júdódeild sem er í dag stærsta júdófélag á Íslandi og er sérstök fyrir þær sakir að hún hefur eingöngu verið rekin í sjálfboðastarfi og nemendur greiða engin iðkendagjöld

Hilmar Veigar Pétursson

Fyrir störf á sviði tækni og vísinda

Auk þess að hafa leitt CCP í gegnum viðvarandi velgengni og gríðarlegan vöxt hefur hann tekið virkan þátt í að móta leikjaiðnaðinn sem og uppvöxt upplýsingatækni og frumkvöðlastarfsemi almennt á Íslandi.