Hanna Ragnarsdóttir

Störf á sviði tækni og vísinda

Hanna Ragnarsdóttir útskrifaðist með bachelor gráðu í tölvunarfræði með áherslu á gervigreind (e. artifical intelligence) við Háskólann í Reykjavík árið 2018 með hæstu einkunn. Áður hafði hún lokið bachelor gráðu í næringarfræði við Háskóla Íslands. 

Hanna var einnig meðlimur í /sys/tur, félag kvenna í tölvunarfræði og tók virkan þátt í því starfi sem felst m.a. í því að kynna félagsmeðlimi fyrir starfi og reynslu kvenna úr tæknigeiranum og benda á fyrirmyndir. Hanna vann hjá Nox Medical árin 2018-2019, fyrirtæki sem er mjög framarlega í svefnrannsóknum, þar sem hún nýtti vélrænt gagnanám (e. machine learning) til þess að greina svefnmynstur hjá notendum svefnmæla Nox. Hjá Nox vann hún að verk­efni sem hét: Þróun á al­grími til að finna örvök­ur í sof­andi ein­stak­ling­um með því að skoða önn­ur líf­merki en heila­rit og sann­próf­un á aðferð til að greina or­sak­ir kæfis­vefns með stóru gagna­safni. Rannsóknarteymið hennar hlaut nýsköpunarverðlaun forseta Íslands 6. febrúar 2019. Einnig hlaut teymið annað sæti á Physi­o­Net 2018. 

Hanna hóf nám við ETH Zürich í Sviss árið 2019 með áherslu á vélrænt gagnanám (e. machine learning) þar sem hún var ein af fjórum nemendum sem hlutu hinn virta ESOP (Excellence Scholarship & Opportunity Programme) skólastyrk. ETH er einn af virtustu háskólum heims á sviði tölvunarfræði og leggur mikið upp úr öflugu rannsóknarstarfi og nýsköpun. Hér má sjá viðtal við Hönnu þar sem hún segir m.a. frá rannsókn þar sem hún nýtti djúp tauganet (e. deep learning) á gögn sem eru mikilvæg í tengslum við krabbameinsrannsóknir: https://www.youtube.com/watch?v=XuWK2dVib_s. 

Haustið 2020 starfaði Hanna meðfram skólanum sem sérfræðingur í velnámi (e. machine learning engineer) hjá nýsköpunarfyrirtæki í Zürich sem þróar kerfi til að hjálpar starfsfólki hjá fyrirtækjum til að öðlast nýja þekkingu sem nýtist í starfi út frá þörfum hvers og eins einstaklings. Til þess er vélrænt gagnanám (e. machine learning) nýtt til þess að mæta þörfum og getu hvers og eins notenda í kerfinu. 

Í febrúar 2021 var Hanna ein af fjórum sem hlutu styrk frá Menntasjóði Viðskiptaráðs Íslands (https://fb.watch/9aeZ0Qrr6v/ ). 

Á árunum 2018-2020 hefur Hanna verið höfundur 5 birtra greina sem tengjast efnum á sviði tölvunarfræði eins og nýtingu gervigreindar í svefnrannsóknum og þróun á skilvirkum gagnavinnslu algrímum fyrir mjög stór gagnasöfn. 

Frá mars til júlí 2021 var Hanna ráðin í starfsnám hjá tæknirisanum Apple þar sem hún var hluti af machine learning teymi. Þar tókst hún á við rannsóknarverkefni í tengslum við málgreiningu (e. natural language processing) og hlaut mikil lof fyrir störf sín þar. Núna vinnur Hanna að meistaraverkefninu sínu við ETH undir handleiðslu Prof. Dr. Julia Vogt hjá Medical Data Science Lab. 

Meistaraverkefnið hennar felst í því að þróa vélnámsalgrím (e. machine learning algorithm pipeline) til þess að greina hjartagalla í fóstrum og hjá nýburum stuttu eftir fæðingu þar sem mikil áhersla er lögð á að greiningar algrímisins séu skiljanlegar fyrir notendur (e. interpretable machine learning). 

Hanna Ragnarsdóttir er sannarlega fyrirmynd sem á bjarta framtíð fyrir sér á sviði tækni og vísinda. Þrátt fyrir að Hanna sé enn í námi og byrjaði aðeins að forrita fyrir rúmlega 6 árum hefur hún afrekað mikið á sviðum gervigreindar í tengslum við heilbrigðisvísindi, menntavísindi og málvísindi. Hanna er staðráðin í því að koma til Íslands með þá þekkingu sem hún hefur aflað sér, þar sem hún hefur mikla trú á að Ísland geti staðið framarlega í rannsóknum á sviði gervigreindar og hvernig við getum nýtt hana til góðs í þágu samfélagsins.